नरा !

शरीराच्या ज्या वळणांपाशी तू
येऊन थांबतोस ना;
खरंतर
मी सुरू होते तिथेच!
सगळ्या वळणांना 
सहजतेनं स्वीकारत
मी उतरते आत आत...

मला कधीच
अडकून राहायचं नसतं
फक्त शरीरात,
फक्त दिसण्यात!
त्यापलीकडे असणाऱ्या अस्तित्वात
खोल खोल
उतरायचं असतं मला.

त्वचेच्या पलीकडे
कितीतरी असतं ना?
मी रमते तिथं!
बाईपणाची असंख्य रूपं
मी जगते, भोगते,
सांभाळते, मिरवते.
म्हणूनच मी फक्त
मादीच नसते रे सर्वकाळ!

तू मात्र कायम अडकलेला
माझ्या घाटदार वळणातच

हे नरा...!

- स्मिता